高溫瑜伽 (續)

上回同大家講過既bikram yoga,結果我上了3堂,其實效果,設施同導師,員工等我都好滿意,但始終我都係怕悶,join左又唔知自己會玩幾耐,自己又鬼o禁多野想玩,所以都係拒絶左入會

最近o係雜誌度睇到公司附近(新世紀)既living yoga有得試玩,好奇心驅使之下book 左o尋晚去玩.由於新開張既關係,地方都幾乾淨企理,我揀既時段都係上高溫瑜伽堂,都好,有得直接比較兩間既分別.

我既個人意見係,bikram不論導師,職員,設備,價錢,效果都比living勝一籌.

先講導師,我o係bikram上既3堂都由不同導師教,有美國,澳洲同印度人等;living有中國人,印度人,但bikram就令人有賓至如歸既感覺,佢地o係上堂前後會同你傾計,又會記得你個名,仲會好留意每位同學既動作做得o岩唔o岩,唔o岩會親自前來指點你.

職員方面,B的consultant會好細心咁打電話叮囑你兩個鐘之前唔好食野,又會安排你一齊見導師,感覺都好warm.

至於設備呢,B有大量毛巾供應,又有膠袋,水機,好體貼...連清潔嬏嬏都多d.

而價錢呢,兩者都有俾月費任做既plan,但living貴10蚊之餘,仲要join兩年先得,B就join一年就ok($400左右1個月),當然啦,佢地都有其他唔同既plan,我只係拎最typical的plan來做比較啦.

效用方面,living 1堂只有1個鐘,bikram就個半鐘,呢個好唔好就見仁見智啦,因為上堂途中唔走得,bikram又真係幾難頂(中途有唔少會員要坐低休息),living既動作相對較簡單(但佢地有level 2既班).就我自己而言,個半鐘所需既能量當然多d啦,人都會累d,不過由於我之前玩開都係個半鐘,所以1個鐘唔係好夠喉.此外,living既studio比較溫和,好似酷熱夏天既街咁(36度),bikram就真係一入去就覺得非常熱(40度),自然出汗都會多好多

試玩報告完畢.如果你真係有興趣玩YOGA呢,我建議你去唔同既公司試玩下先,依家好多間yoga都有得免費試玩,自己做下比較先,找一間適合自己的去玩吧!